Jetzt als Podcast anhören:
Weihnachtsmarkt auf dem Paradeplatz in Mannheim, Ende November 2025.
Gliehwoikärwe
Hans-Peter Schwöbel
Zwische Bergschdrooß un Woischdrooß, Odewald un Haardt wärrd’s gonz Johr gfeiert bis dief in de Herbscht noi. Un wonn uns gar nix mehr oifällt, saache ma Woihnachtsmarkt dazu. Än Woinachtsmarkt-Profi, hodd ma awwa gsacht, Woihnachtsmarkt wär bloß de offizielle Name, fär die Presse un so. In Wirklischkeit heeßt in Monnem un in de Kurpalz de Woihnachtsmarkt Gliehwoikärwe.
Uff de Gliehwoikärwe trifft ma die Leit zu Dausende. Letschhin haww isch om Wassaturm in zäh Minudde zwonzisch Leit getroffe, mit dänne war isch nädd verwondt un nädd verschwägert, un trotzdäm hawwe ihr Knie genau in moi Kniekehle gebasst. Do konnsch froh soi, dass die Gliehwoikärwe om Wassaturm kreisförmisch organisiert is. Wonn ma mol drin hängt in soinare Reih, geht’s.
Schlimm sin die longgezogene Woihnachtsmärkt, wo om onna End rumgedreht wärre musch, dass in Doinare Reih widda zurick gschoowe wärre konnsch. Om meischde duun ma die Müdder leed, wo uffbasse misse, dass die Kinna schää hinnare drinhänge un dass gonz hinne de Vadda nädd valore geht odda abhaut.
Monschmol griggsch än Hund ins Gsischt, weil die Daggl misse jo ihr Hunde…, ääh, die Leit misse ihr Daggl draache, dass känna druffdabbt.
Wonn Gligg hosch, konnsch aa mol in ä Broodworscht noibeiße, wo grad vorbeigedraache wärrd. Musch awwa uff Zack soi! Probiere Se’s mol. S’braucht Üwung. Isch will jetz nädd oogewwe, awwa isch habb ä rischdischi Meeschdaschaft entwickelt. Isch mach’s awwa aa schun fuffzisch Johr: Beim Erschde, wo vorbeikummt, beiß isch in die Worscht, beim Zwedde nemm isch de Sempf, beim Dridde beiß isch innän Wegg. Un wonn isch Gligg habb, kummt änna mime Bescher Gliehwoi nooch.
On ää Reegl muss ma sisch uff’m Woihnachtsmarkt awwa aa in Monnem halde. Die heeßt: Nädd aus de Reih donze. Wonn Se mol in Ihrer Reih drin sin, bleiwe Se drin. Die Reihe därfe sisch unnaschiedlisch schnell bewege, schunsch klappt des jo midm Worschtschnabbe nädd. Awwa nädd aus de Reih donze, wie ischs erlebt habb:
Isch wärr grad in moinere Reih vorwärts gschoowe, habb moi Knie schää in de Kniekehle vum Vordermonn un moin Hinnamonn soi Knie in moine Kniekehle - plötzlisch brischt ä Fraa aus ihrer Reih aus, weil se än Wärschtelschdand gsehe hodd un hie will, rennt misch iwwa de Haufe, bleibt mit ihrer Strickjack on moim Ring hänge – isch Halt! Halt! gerufe - die Fraa hodd nix gheert, vor lauda Broodworscht. Wie se hie kumme is, hodd se bloß noch die Ärmel oo ghabt, un isch zwölfhunnad Gramm Woll om Ring hänge. Hawwe Se sisch schunnemool zwölfhunnad Gramm Woll vun de Finger geknoddeld - im Ligge?!
Diese kleine, freundliche Satire auf den Weihnachtsmarkt habe ich vor vielen Jahren geschrieben. Ein guter Freund hat mich an sie erinnert. Deshalb präsentiere ich sie hier nochmal. Mit Wehmut. Waren das goldene Zeiten, als man Weihnachtsmärkte so entspannt erleben und ironisieren konnte. Perdu!
Die roten „Pyramiden“ mit Schlitz sind keine Fahrradständer, sondern Anti-Terror-Poller, nach dem Engel Angela auch Merkel-Poller genannt: „Nu sind se halt da…“
Der Schwöbel-BLOG am Samstag, 06.12.2025
