Jetzt als Podcast anhören:

Krippe: Kazimierz Kowalczyk

Evangelische Kirche Zotzenbach

Foto: Hans-Peter Schwöbel

Woihnachtsgschischt

Übertragen ins Kurpfälzische von

Hans-Peter Schwöbel

„Domols hodd de Kaiser Auguschdus än Befehl rausgewwe, dass alle Oiwohner in de jüdische Kolonie’e vun Rom sisch in Schdeierlischde uffnämme losse misse. Des war’s erschdemol, dass so was gemacht worre is; zu därre Zeit war de Quirinius Statthalder in Syrie. Do sin alle losgezooche, jeder is in soi Stadt, un hodd sisch oidraache losse.

Do hodd sisch aa de Josef vun Nazareth in Galilea uff die Sogge gemacht, nuff ins jüdische Lond, in die David-Stadt Bethlehem, weil er vum David abschdommt un zu soinere Familie g’heert. Er wollt sisch oidraache losse, zomme mit soinere Fraa, de Maria. Bei de Maria war was unnawegs. Wie se hiekumme sin, hawwe die Wehe oigsetzt, un sie hodd ihrn erschde Buu uff die Welt gebrocht. Sie hodd’n in Windle gewiggeld un in ä Fuddakripp gelegt, weil schunsch kään Blatz fär se war in därre Herberg.

In därre Gegend ware Hirde uffm Feld on ihrm Hag aus Dornegschdripp un hawwe in de Nacht uff ihr Herd uffgebasst. Un do guggsch: Uff ämol steht n’Engel vun Godd voränne, un’m Herrgodd soi Lischt hodd se oighillt. Un um se rum war alles so klor un wohr, wie se’s noch nie gseh ghabt hawwe, un sie hawwe arg Ongschd griggt, awwa de Engel hodd gsacht: Ihr braucht kää Ongschd hawwe, isch bring Eisch nämlisch ä grossi Freed, un s’gonze Volk soll se aa erfahre. Im David soinere Stadt is Eisch heit de Heilond gebore, de Herr Chrischdus. 

Do druff missda acht gewwe: Ihr find des Kind in Windle gewiggld, inare Kripp ligge. Uff ämol war beim Engel ä himmlischi Schar, die hodd Godd gelobt un gerufe: Härrlisch is Godd iwwa uns, un uff de Erd is Friede bei de Mensche, weil er ne gnädisch is.

Wie die Engel widda fort un in de Himmel uffgfahre ware, hawwe die Hirde zuänonna gsacht: Kumm, ma gehe noi noch Bethlehäm, un gugge, was do los is, was de Herrgodd uns hodd saache losse. Do sin Se dabber losgeloffe un hawwe die Maria gfunne un de Josef un außerdem s’Bobbele in de Kripp. 

Un wie se’s gsehe hawwe, hawwe se jedem vazählt, wasenne iwwa den Klää gsacht worre is. Un all, wo des gheert hawwe, hawwe mords gschdaund, iwwa des, was die Hirde do gsacht hawwe. Die Maria hodd’s dief in ihrm Herz uffghoowe un sisch ihr eigene Gedonke gemacht. Die Hirde sin donn widda uffs Feld gonge un hawwe Godd gelobt unn gebriese fär alles, was se gsehe unn gheert hawwe; weil’s war alles so, wie s’ne gsacht worre is.“

 

So wärd’s im Lukas-Evongelium (Lukas 2, 1 - 20) vazehlt. Historisch authentisch isses sischa nädd. Die Unnaschiede zu de Woihnachtgschischt beim Matthäus sin groß, un zomme ligge se kreiz un quer zu historische Befunde. Macht nix! S’is ä Gschischt voll Lieb un warmem Lischt. Dodrum geht’s.

Möge uns gelingen, diesen geistigen, geistlichen und sinnlichen Schatz der christlichen Weihnacht wieder zu entdecken und zu bewahren gegen alles, was uns davon abbringen will. Die Körper der Krippenfiguren in der Evangelischen Kirche Zotzenbach wurden von dem polnischen Künstler Kazimierz Kowalczyk aus den alten Balken des Glockenstuhls gemacht. Sie hätten eigentlich weggeworfen werden sollen. Und was hat der Künstler daraus gemacht! 

Ich bin sicher, dass viele meiner Vorfahren in Zotzenbach unter diesen Balken und Glocken im Gottesdienst saßen. Susanna und ich haben die drei Hirten gestiftet, verbunden mit der Bitte, es möge eine Hirtin dabei sein. Der Künstler hat diesen Wunsch wunderbar erfüllt.

Kazimierz Kowalczyk: Drei Hirten 

Gestiftet von Susanna Martinez und Hans-Peter Schwöbel

Foto: Hans-Peter Schwöbel

 

Der Schwöbel-BLOG am Samstag, 20.12.2025